Fermer
croissant-lunaire-ramadan

Mhend n At Lhif yerwa tidak yuran. Yekreh iman-is ugar ticki id yewwed waggur n Remdan imi yeqqar netta aggur n lmehna. Netta yettqadar igad yettuzumen maca wiyad ur ttqadaren ara tiktiwin-ines, ur gzin ara tamedrurt i deg yettidir. Netta ixeddem deg yitij amahil n cedda. Ilaq ad yecc, ad isew akken ad yeseu tazmert is ara iqqabel uguren n umahil.

Ifuk ccek, azekka ad yebdu waggur n Remdan. Mhend yettxemmim amek ara yexdem akken ad yaff tifrat i wugur-agi id ittezzin yal aseggas. Achal aya, yettuzum war lebghi. Yettaggad irebraben. Macci d widak kan n tezgi, yettaggad ugar widak yellan deg ubrid negh deg uxxam. Widak n tezgi, akk nghen abrid s ubeckid maca wiyid neqqen s yir tamughli d yir lehdur, s tmes tamectuht.

-“Amek ara ccegh? Amek ara swegh? Ulamek! Imdanen ghelben tiwedfin. Yerna win yeccan Remdan ulac smah ulac! Tzemred ad takkred lbut negh idrimen, ad tenghed tamgret, ad t -xedmed akk tighawsiwin n diri war uguren maca ad tecced Remdan d awezghi, ad terwud uguren imeqranen.”

Mhend n At Lhif yekker-d ssbeh zik send ad tekker tmettut-is.Yenwa ad iseww tiqit n uyefki s tufra, s tusra, s tsusmi. Yewwi-d taculit n uyefki deg usismed. Yeddem-d takasrunt, teghli-as deg yifasen-is, texdem lhes anect ilat. Tukki-d tmettut-is, tuzzel-d, tettef-it “en flagrant délit ” akken i qqaren s tutlayt n teghdemt.Tenna-as s usughu:

-“Ur tsethad ara deg yiman-ik, awessar am keccini, ad tecced taxatemt n Remdan id yegga Rebbi d Nnbi, ay aqadum n ccitan!”

Yeffegh Mhend deg uxxam, awal ur t-id yulli. Yewwi abrid gher umkan n umahil. Ghef 12:30, yughal-d s axxam akken ad yesgunfu. Yuffa-d yemma-s (d tamghart, d tamudint), tsett seksu d uyefki s zbib, sdat-s yiwen wefjur n delae d ameqran, d azeggagh, yejreh ul-is. Yettgabar amek ara t-yecc. Cwit acemma, truh yemma-s gher texxamt-is maca mazal teqqim-d tmettut-is. Yettqelib ad yaff tifeskirin amek ara teffegh deg uxxam, yenna-as:‎

-“Tajarett-nni negh it hemmled akken teffegh-d di sbitar, ilaq ad t-kecmed ghur-s ad s tawwi-d tamrawt n tmellalin.”

Ticki yudan, necca imekli, ad kecmegh ghur-s.”

Sghur Hemmar Bussaed.Photo Lounes Djebbari

 

Rédaction

L'auteur Rédaction