Fermer
no thumb

Tawacult n tẓuri taqbaylit t-deggar yiwen n wejgu n ccna n teqbaylit, id-yefan aṭas i yedles amaziγ Wagi d Mulud Ḥabib d yiwen n ucenay i yesεan anzizen n taγuct n ddheb imi ihuz deqs n tsutiwin.

Dγa isali n tmettant-is yaγli-d am siεqa, ur yebni ḥed fell-as, yemmut di sbitar Mustapha Bacha di Lzzayer tamanaγt ass n ssebt 25 maγres deg aggur ideg nella, labaεda imi yettnaγ d waṭan acḥal iseggasen-aya, yesεa 62 n yiseggasen di laεmer-is, dγa d aṭan-agi it-iεezlen γef ccna.

Mulud ḥabib, issem-is aheqqani Mulud Abib, yeğğa-d agarruj ur nettfaka i tsutiwin id iteddun. Anaẓur Mulud Ḥabib yesekles deqs n tezlatin swayes it-ḥemlen yemdanen, amedya “Sṭṭarḍaq zalamiṭṭ am laεyun, A Σeljiya” d waṭas niḍen.
Aseggas n 2012 yezrin, Mulud Ḥabib tuγal-as tejmilt deg wexxam n yedles n Lmulud At-Mεemmar deg Tizi-Wezzu, anda id-rrzan aṭas n yinaẓuren d yemdanen it-iḥemlen, dγa deg tallit-nni yaγtes akken ad-yesekles tizlatin timaynutin.

Mulud Ḥabib illul ass n 08 yennayer asegggas n 1951, anda i yelmed ulmud n tiknik, maca ur-iεeṭel-ara yewwi abrid niḍen, abrid n ccna, yekcem di lebḥer n tẓuri aseggas n 1960, ass-mi yella taqcic amecṭuḥ, yesεa deg lawan-nni 13 n yiseggasen di laεmer-is, anda id-yeseklas yal ddurt tadwilt s usentel Arrac imecṭaḥ di radyu taγelnawt Tazzayrit amaṭṭaf wis ssin n teqbaylit, netta akk d yiwet n tγemmart n yedles n teqbaylit, wagi d Muḥemmed Ben Ḥanafi, is yettarun iḍrisen n tezlatin-is amedya “Nekk d amjahed amecṭuḥ”, imiren kkan anaẓur Kamal Ḥemadi yerra tamuγli-s γer Mulud Ḥabib d akken yezmer ad-yufrar ger yetran n ccna n teqbaylit, dγa yettεawan-it swayes yezmer.

Maca Kamel Ḥemadi ur-yeγliḍ-ara deg ayen tettwali tmuγli-s, yuffa-t-id akken yella, dγa deg tallit-nni ixdem-as tizlatin aṭas ger-asent; A yaḥbib a ggma a yaγrib, Tasaεdit, Tajmaεt, Ferruja, Amγar azemni, Mi d-tεedda, Abeḥri d waṭas niḍen.

Deg seggasen n 1970, Mulud Ḥabbib irra ad-iban ger wudmawen mucaεen n ccna n teqbaylit ger-asen; Kamel Ḥemadi, Lounis Aït Menguellet, Slimane Chabi, Saïd Hilmi, Cherif Kheddam, Chikh Nouredine, Mhenni, Mdjahed Hamid d waṭas niḍen.
Dγa,tewwit tmettant ass n 25 maγres 2013 u yettwemṭel ass n 27 maγres di taddert-is n Yiεezzuzen, tamnaḍt n At-Yiraten.

Islam Bessaci

Rédaction

L'auteur Rédaction